St. Martin - Dr' Nußmärtl kommt  - Liebenswerte Erinnerungen aus der Kindheit

Wenn Kirchweih gfeiert war, ond Allerheiliga rom war, no send os Kender ebbl a weng ängstle wora - denn iaz wars nemme weit bis an Nußmärtldag.
Os hond zwar net ganz recht globa kennt dass den kommischa Gsell wirklich gitt aber er isch halt doch jedes Johr vorbei komma.

Im Ries und seinen angrenzenden Dörflein war nur der Nußmärtl bekannt.
Gerade rund um Mönchsdeggingen, deren Klosterkirche ja dem hl Martin geweiht ist, war "dr Merdesdag" ein besonderer Brauchtumstag. Selbst in rein katholischen Gegenden war der HI. Nikolaus völlig unbekannt, "den hots einfach net geba em Ries". Erst wie os end Schul komma send hot d Fr. Lehrerin erzählt vom HI. Nikolaus. Mei, wenn os Kender wieder halt a mol net gar so brav warad, so hot d Mutter ebbl gmoid:" Kender ui werad guga iazt kommt bald dr Nußmärtl, der wois fei alles. Der steckt ui end Saak nei." Des hot os Kender gar net gfalla denn vorm Nußmärtl hond alle Kender Angst kett 0 no di greßere.
Ond i glob scho, dass den Ma geba hot der wohnt nämlich draußa em Holz. Wenn os mim Vater onderwegs warad durchn Wald dann hots do ebbl dia gloine Holzhäusla geba ganz em dichta Wald dren. Ond dr Vater hot verzählt, end dene Häusla wohnt dr Nußmärtl ond der füttert 0 dia Reha ond Hasa em Wender.
Os warad froha daß mr den Nußmärtl do aber nia gsecha ho nd ond s Herz war os leichter wie mr den oheuliga Ort wieder verlassa hon kenna.
Bei os wars halt so, do isch dr Nußmärtl ebbl am Vorobad des Martinstages also am 10.November komma.
D Kuche war ganz ordentlich aufgeräumt. Em Holzofa hot a guts Fuer brennt denn da Nußmärtl solls net friera. Os Kenner warad scho gwescha ond hond scho da Schlofanzug a kett. So hommr mit großem Herzklopfa gwardad of da Nußmärtl.
No hot man scho kert da Nußmärtl wie nr kommt. Noi, gschellt an dr Hausglock hotr net. Jedes Ked wois, dr Nußmärtl hot a großa schwerea Kette drbei dia wo feschte kleppert.
Os Kender warad en dr Kuche aufm Kanapee ghockt, d Oma of dr
Holzbaak, dr Onkel Hans und Tante Anna om da Disch rom.
D Muttr isch glei naus en Hausgang ond hot em Nußmärtl aufgmacht. Freindle hotsn rei bitt.
Mit seiner Kette ond seine schwere Stiefl hotr beim Eindreda an mords Radau gmacht. Dr Nußmärtl hot an alta langa dicka Mandl a kett, schwere globige lange Gummistiefel, dia ebbl ausguckt hond wie em Vater seine. Große Händsche hotr a kett, dia hotr nie ra do. I wois 0 net warom. An recht alta Hut hotr auf ket 0 wieder so oin wie osr Vater am Werchde zom Schaffa auf hot. A weng komisch war das dr Nußmärtl ebbl a feis Kopfdüchle vorm Gsicht hanga kett hot. Ma hot so gar net sei Gsicht gsecha ond widdr isch mir des bekannt vor komma, so ois hot nämlich d Mutter 0 em Kaschda denn kett. Dr noch als dr Nußmärtl furt war han i mei Beobachtunga dr Mutter verzählt, ond dia hot gmoid: "Woischt des isch nix Bsonderes, dr Nußmärtl koft halt 0 so wie os, ds Näärle ei." Sie hatte recht. Das war eine einleuchtende und glaubwürdige Erklärung.
Dr Nußmärtl hot os "Gutan Obad" gsagt, ond dann hond os osre glernde Versla aufgsagt ond beda hommr ono gmesd. Aber des homr kennt, koi Red, .... "Jesukendle komm zu mir" ... ond "Heiliges Schutzengele" .... ond "Dia Eltern mein empfehl ich dir' ... no hot o ds Beda gräucht. Fast hot dr Nußmärtl no ebbes drvo gsagt dass i a weng scheaner schreiba sollt ond zo meim Bruder hotr gsagt er muß obads rechtzeitig hoi ganga wenns Gebet leit ond net no ewig em Dorf omananter streicha.