Sei a Sega fr mi

A Sega fr mi bisch Du

wenn Du a weng vrstosch, daß mei Fiaß nehme so gond ond mei Haad a weng zittert

A Sega fr mi bisch Du

wenn Du mi oifach losch wenn i nemme maag wenn Du mier z Essa machscht - des was i a Lebtag kennt ond o gera gessa ha

A Sega fr mi bisch Du wenn Du a weng vrstosch

daß mei Ohra se astrenga measat

om alles aufzom nehmma was ui mier sag at

A Sega fr mi bisch Du

wenn Du a wenig vrstosch, daß mei Oga triab wora send

ond daß mei Gedanga langsam ond dräg wora send ond daß i ebbl a mol ebbes vergiß

A Sega fr mi bisch Du

wenn Du grad raus Lacha kaasch ond a weng bei mier verweilsch

ond a weng mit mier ratscha duasch

A Sega fr mi bisch Du

wenn i nia von Dier gsagt griag

" Mei dia Gschicht hosch mr scho fempf mol vrzählt"

A Sega fr mi bisch Du

wenn Du Dier a hera kasch dia alte Gschichta von frier wo i gwies wois das frier alles bessr gwesa isch wia iatz

A Sega fr mi bisch Du

wenn Du Erinnerunga von frier en mier wegsch wenn Du mi vrzähla losch von frier

ond wenn de Du mit mier fresch

Du bisch a Sega fr mi wenn du mit mier en aide vrgilbde Fodoalbum gruschdla duasch

A Sega fr mi bisch Du

wenn Du mi weidr mei selbr gschdrickde Strempf ando losch ond mei Kopfduch brauch i 0

Ond a Sega fr mi bisch Du

wenn di mei Schurz net stert

den i a hab ibr meim selbr gnäda Kloid

A Sega fr mi bisch Du

Schweschdr, Du sigsch vrkehrd, Du sigsch vrkehrd!

Schweschdr, was sigsch Du? Was sechad ui? Was denkad ui, wenn ui mi a gschobad?

"A verbittrds, verbohrds verwirrds alts Weib, net recht gscheid,

o'sichr en ihrm Doa,

wackleg in ihrm Bewega ond en ihrm Lofa mit leere groaße ens weide gugade Oga".

A Fro, dia beim Essa a weng driald ond ebbes vrschitt am Disch. A Fro, dia nix mea saggt 0 wenn Du no so laut moinsch

" Kommats, den S' wenigschdns a weng probiera!"

Es scheind als ob sia dia Sacha om se rom net merkt.

Es isch als ob se ebbl ebbes vrmissa det, als ob se ebbes verlora het, an Schtropf, an Schuha, odr ebbes andrsch.

Sia hot koin Willa mea, Du desch alles doa was Du willsch, ond Du mergsch gar nemme obs iihr recht isch.

Der Dag god rom mit Wescha odr Bada ond mit Essa eigeba.

Isch des "Des", was Du denksch von mier ond was Du siegsch? Schweschdr, nocht mach Dei Oga auf ond guck !!!

DU SIGSCH GAR NET MI !!!

I will Dier iatzt vrzähla wer i ben ond warom i do so vrlossa do hock, scho dra gweht

an Dei Aweisunga, an Dei Sorg om mi, an a lies was Du moisch was guat fr mi isch, -- alles loss i ibr mi erganga, -- a lies schluck i na I!!

I ben a klois Ked, ois von zea Kendr, mit Vatr ond Muattr, mit Bridr ond Schweschtra. Aufgwagsa ofm Dorf. Oifach war ma ond ds frieda.

A jongs Mädle ben i, grad 16 Johr alt. Schmettrling em Bauch. A Bua hot a Og of mi. So danz i glickle senirad durch da Moi.

A Hoochzeitre scho mit 20 Johr ben i - mei Herz macht an Sprong, wenn i dra

denk wia i gstanda ben vorm Traualdor. Es hot nor geba Di fr mi. Du mei Greaschts.

Mit 25 Johr hab i drei Kendr, dia brauchad mi, i muß of dia guga. Schaffa muß ma. A Johr zieagt aus ond glei a Nuis zieagt ei. So nemmts sein Lauf.

A Fro mit 30 Johr ben i. Mei Kendr werad schnell groaß. Em Hof duat ma Baua ond Richta. Ebbl ds spara net vrgessa onds sorga.

Mit 40 Johr, d Schwiegrleit kennat scho laang nehme. Dia muß i heba ond lega ond pflega. Des du i gera en Ehrfurcht ond ehane zom Dank. Koi Red weard.

Mit 45 Johr mei Kendr send groaß, hond keirat ond gond iihre Weg. Os Haus wird leer. Mei Ma isch bei mier ond om mi rom.