Isch des Dagwerk gschafft ond got der Dag d's neig

no muß i no a paar Schritt naus end Flur, naus ends Feld

am besta nauf glei ds oberst en da Schweda.

Hock i do nocht of dr Hoid

vor mier broit se aus dia Herrlichkeit. Lengs diba guckt Hochstoi zo mir rom erhaba raus sticht des Margaretakirchle ond weitr schweift mei Blick

dr Michlsberg der guckt do ra von dr obra Pfarr, ond glei dr nebr lengs dieb liegt ganz bescheida Frohhofa do, des Zwiebeltürmle des spitzt ra.

Dr hendr ka ma 0 no sea

zwoi Dürmla ragad en da Hemml, of Deamrtsstoi measat dia keara ond wenn dia Sicht klar ond weit no griaßad gar no ra zo mir

dia Haisla dia zo Warnhofa kehrat.

Ganz vorn glei, nochm Holz vom Roßberg,

do kama dia Hefla von Obermagerboi no seha. Freile rechts von mir liegt endr Feierobadruha Magerboi do, ond guckt mir zua.

No von irgendwo her, Glocka den leitn zom "Engel des Herrn"

de oine von nah ond de oine von fern

des dut se a hera wie a himmlicher Gesang.

I hock so am Boda, d Grilla em Chor zirpsad om mi rom em Gras

dia Schleeahecka om mi rom bliat en wonderscheaster Pracht

ds Holz wird 0 wieder lebende ond schieabd nuis Greea aus alle Rieadla

d Milchsteck sprießad gelb aus sade greane Wiesa ond dÄcher send gricht ond nei gsät isch 0 scho. An jedem Holzeck stood a Jängerstand.

I hock do so do ond geniaß dia Ruha

ond wiea i so do hock ond ahne senier ond studier so kommt mr en Senn

grad so muaß sei em himmlischa Garta,em Paradies!